(1908) Dende la puerta llagar
Amigu Riberu, de tou mi arrespetu. Salúdote co las palabras del Angel, San Narciso, patrón de los faroles sin lluz.
El únicu númeru que mandesti pa cá al vuestru padre, amigu, parienti y apoderau Benino, el Reservau, aleímoslu na Tijerina, en caxón de Donato y en toa las tiendas y tartulias de la villa. Tá ya mas sobau qu'el bigotín helau del jíu del Derechu, que las grominas del rapaz de Francisquín cuando parllaba á lo sabiu na Vega la Portiella, regolviendo á Roma co Santiago, ó cuando aturullaba á los del "Orienti" pa que i poblicara los procesos sobre la política de Llanes que salían preñaos de la su mollera, dempués d'un embarazu de siete meses. No i lu poblicaron entoncias porque tou so gustu era sacar las castañas del jueu co mano ajena y pizcar a los demás dentrás de la cortina p'arreíse d'ellos sin que lu vieran.
Más de la metá de lo que parllas en las tus colunas ya lo teniamos tan deprendíu com' el silabariu de Pepín de la Suela, por habelo oíu al hombre célebre (aunque de apellidu llargu) D. José Antonio García Mijares y habelo leíu nas cartas del engenieru Lessep a la su familia de la nuestra calle.
Si no tenéis más na mollerina de miruellu vais á ser machorros como las oveyas del tíu Clavelín y no golvereis a vevos empreñaos pa parir naciones roguetas nel pedrióricu.
Sois el mismu demongriu con patas d'Adelino, quien s'apaez a un parru arrablau en los sus andares cuando i desputan la jembra na ria del Riberu.
¡Ae María de Gracia Plena Dominus Tecum! Bendita sean las madres que paren jíos tan despabilaos. ¡Benditos sean los padres que sacan pollos tan leíos y escrebíos! ¡Bendia sea la calle Llagar que sirvió de nidu á estas calándrigas que cantan nas Américas y allega aquí el ecu de las sus voces! ¡Josús, Josús y mae mil veces Josús!
Asina rulaba anoche nel balconín de la su casa el Porruganu antes d'ise pa la cama.
Y no paró en eso. A las diez golvió a despertanos el Porruganu dende el su balconín pa decinos a gritu llenu:
Ahora bien l'arreglu de la villa. Los rapaces de la mi calle tomaron la quistión por suya y van á despanzurrar el llombu á toos los qu'andan metíos nel Ayuntamientu, na pulítica, nos juzgaos y nos predióricos.
Ellos deprendieron muchu po las tierras del otru mundu y van á mantenéselas tiesas co las sus gromas, las sus burllas y los sus pizcos daos co la pluma, á toos los cacicones, mandones y mangollones que regüelven esti cotarru anantes tan pacíicu.
Gastan muchu fueru estos diantres y é bueno cortayos los güelos. Era lo que yos faltaba. Que dende Méjico haiga jíos despabilaos de la villa que pol mediu de la mano metía nas emprentas yos las mantengan tiesas toos los días, ca día, diaramente á reu. Asina, demongriu, que caben pa que no güelvan a ponese empinaos de la cabeza.
Lo únicu que me desgusta é que s'atrivan á dicir que no debemos tener más rosarios po las calles que los de las castañas. Eso agüelme á consejos de Satanás. ¡Paez mentira que Baltasarín escurra d'esi modu! ¡El que é tan listu y tan güenón con una carina más pola y más guapina q'una vieya de güen tresnu.
Esto é lo que te cunto por hoy, amigu Riberu.
Un abrazu del tu vecinu.